உலக இலக்கியங்கள் பலவற்றிலும் அதன் போக்கில் புதுவகையான மாற்றங்கள் ஏற்பட்டு வருகின்றன. அதன் பாதிப்பில் தமிழ் இலக்கியத்தின் வடிவங்களான கட்டுரை, கவிதை, நாடகம், புதினம் ஆகிய வடிவங்களில் குறிப்பிடத்தக்க அளவில் மாற்றம் ஏற்பட்டு வருகிறது. பத்தொன்பதாம் நூற்றாண்டின் இறுதியில், மேற்கத்திய இலக்கியத்தின் வருகையினால், உரைநடையானது. தமிழ் இலக்கிய உலகத்திற்கு வந்து சேர்ந்தது. அதிலும் சிறுகதை, நாவல், நாடகங்கள், திறனாய்வு, கட்டுரைகள் (கடித வடிவம்) போன்றவை உரைநடையில் ஆக்கப்பட்டு, தற்காலத்திய இலக்கியம் எனக் குறிக்கப்படும்படியான வடிவ, உள்ளடக்கத்தையும் கொண்டிருக்கின்றன. மட்டுமல்லாது, அவை சமூகப் பார்வையையும், நடப்பியல் பண்பையையும் ஆதாரமாகக் கொண்டிருந்தன. இன்று தமிழில் கடித இலக்கியமானது. கட்டுரை இலக்கியம் என்னும் வகையுள் அடங்குவதாகவே உள்ளது உள்ளடக்கத்தில் மட்டுமே. பெரும்பான்மையாக வேறுபட்ட புதிய போக்கைக் கொண்டு விளங்குகிறது. மேற்கத்திய இலக்கியத்தில் தோன்றிய கடித வடிவப் படைப்புகள் போன்றே. தமிழில் கடித இலக்கியம் தோன்ற ஆரம்பித்துள்ளது தற்போதும் தொடர்ந்து எழுதப்பட்டு வரப்படுகின்றன. இதனால், அறவியல், நீதிமொழி, வரலாறு, சமூகத் திறனாய்வு, தத்துவம் என்று பலவற்றை உள்ளடக்கமாக் கொண்டு கடித வடிவப் படைப்புகள் தோன்றி வளர்ந்து வருகின்றன. இவ்வகையான, புதிய படைப்பாகக் கருதப்படும் கடித இலக்கியத்தை ஆய்வுக்குட்படுத்த வேண்டிய சூழ்நிலை நேர்ந்துள்ளது.

1. தமிழ்க் கடித இலக்கியம் மேலைநாட்டு கடித இலக்கியத்தின் தாக்கம் பெற்றிருக்கின்றன. 2. அவை வடிவ நிலையில் குறைவாகவும், உள்ளடக்க நிலையில் மிகுதியாகவும் இடம் பெற்றுள்ளன. இக் கருதுகோள்களின் வன்மை, மென்மைகளைக் கண்டறிந்து இவற்றின் வழிப்பெறப்படும் தீர்வுகள் கடித இலக்கியத்தை மேலும் ஆழமாகப் புரிந்துகொள்வதற்கும் தமிழ் இலக்கிய வளர்ச்சிக்கும் துணை செய்யவல்லன.

தமிழ்க் கடித இலக்கியத்தில் காணப்படும் போக்குகளை விளக்குவதற்கு அரசியல், சமுதாயம், சமயம், கல்வி என்ற பல அடிப்படைகளில் வரலாற்றியல் அணுகுமுறை தேர்ந்தெடுக்கப்பட்டுள்ளது.

இவ்வாய்வேட்டின் அமைப்பு பின்வரும் முறையில் அமைந்துள்ளது. 1. கடித இலக்கியம் - அறிமுகம் 2. கடித இலக்கிய வரலாறு 3. கடித வகைகள் 4. கடித நடை

கடித இலக்கியம் பற்றிய சொல்லாடல்கள். அவை தமிழிலக்கியத்தில் வெவ்வேறு பெயர்களில், அதன் பயன்பாட்டுப் பொருளுடன், வழங்கிவந்தமை அறியப்பட்டன. இத்துடன் இலக்கியத்தில் அவற்றின் குறிப்புகளும் அறியப்பட்டன. கடித இலக்கியம் குறித்துப் பல்வேறு படைப்பாளியின் கருத்துக்கள் அறியப்பட்டன. கடித இலக்கியத்திற்கும், மற்ற துறைகளுக்கான நெருங்கிய உறவும் அறியப்பட்டது. கடித இலக்கியங்கள் அதன் பொருள் அடக்கத்திலும், தொகுப்பவரின் எண்ணத்தின் அடிப்படையிலும் தொகுக்கப்படுவதைக் காணமுடிகிறது. தமிழில் கடித இலக்கியத்தின் வளர்ச்சி, சங்கம் மருவிய காலத்திலிருந்தே தோன்றியிருக்கிறது. சங்கம் மருவிய காலத்தில் கடிதம் என்பது உத்தியாகக் கையாளப்பட்டுள்ளதைச் சிலப்பதிகாரம், சீவக சிந்தாமணி, பெருங்கதை ஆகியவற்றின் மூலம் அறியமுடிகிறது. இடைக்காலத்தில் கடித இலக்கியமானது சீட்டுக்கவிதை வடிவில் தோன்றி வளர்கிறது. உரைநடைக்காலத்தில் சீட்டுக்கவிதைகள் தொகுக்கப்பட்டு தனிப்பாடல் திரட்டில் இடம்பெறுகின்றன. உரைநடைக் காலத்தில், தமிழ் மொழியில், முதன் முதலில் கடித இலக்கியமானது புதின வடிவில் தோன்றுவதை மறைமலையடிகள் மற்றும் குங்குமம் - இவர்களின் புதினப் படைப்புகளின் வழி அறியப்படுகிறது. இவை மொழிபெயர்ப்பு இலக்கியத்தின் தாக்கத்தாலும், வாசிப்பாலும் உருவானதைச் சான்றுடன் அறிய முடிகிறது. தனிநிலைக் கடிதங்கள் என்ற வகையில், தனிப்பட்ட நபர்களின் கடிதங்கள் தொகுக்கப்பட்டு வெளியிடப்படுகின்றன. கற்பனைக் கடிதங்கள் என்று இன்னொரு வகையும் அமைகிறது. கடிதம் என்ற வடிவில், ஏதாவதொரு பாடுபொருளைக் கொண்டு, இவை எழுதப்பட்டு வருகின்றன. தமிழ் மொழி மட்டுமல்லாது, இந்திய, உலக இலக்கியங்களில் உள்ள கடித இலக்கிய வரலாற்றைக் காண்பதின் வழியாக, உலக, இந்திய, தமிழ் கடித இலக்கியங்களுள்ளான பொருண்மை, வடிவம், உத்தி ஆகியவை அறியப்படுகின்றன. இவ்வரலாற்றின் ஊடே காணும்போது, இந்திய இலக்கியத்தில் தோன்றிய முதல் கடித புதினங்கள், ஒரே காலகட்டத்தில் தோன்றியமை அறியப்படுகிறது. தவிரவும், அவற்றின் பாடுபொருளும் ஒன்றாகவே அமைந்துள்ளமை அறியப்படுகிறது. மிகவும் குறிப்பிடத்தகுந்த கடிதங்கள் யாவும், ஏதோ ஒரு பயனைக் கருதி உலக, இந்திய, தமிழ் மொழிகளில் பெயர்க்கப்பட்டிருப்பதை, அதைப் போன்றே படைக்கப்பட்டிருப்பதை அறிய முடிகிறது. அவற்றின் மையப் பொருளாக அறவுரைகள், அறிவுரைகள் அமைகின்றதைக் காணமுடிகிறது. நீதி நூல்களின் பணியைக் கடித இலக்கியங்கள் மேற்கொண்டுள்ளதால், அவற்றை, செய்யுள் வடிவிலான நீதிநூல்களின் மறு வடிவம் என்று அழைக்கலாம்.